金鶴拉麵 (和富道) (已結業)

最近屋企附近新開左金鶴拉麵，之前聽朋友講話好食，今次終於有機會親身試下!星期六夜晚大約6點45分去到舖頭，見到位置差不多坐滿，好彩仲有張2人檯。當然，食之前已經做好晒資料搜集，叫左雞白湯沾麵同浦燒活鰻魚串。金鶴雞白湯沾麵睇番餐牌介紹，沾麵選用粗身的麵條，當麵條煮熟後會經過冰鎮程序，難怪食落咁彈牙。雞白湯非常香濃，味道剛剛好，配合彈牙的沾麵，令人食到停唔到口。店員仲好貼心咁提示，如果湯的溫度唔夠熱，可幫忙加熱。叉燒肥瘦適中，另外，慢煮雞胸肉好嫩滑，令我依個平日好少食雞胸的人都改觀。綜合而言，10分滿分我會比9分。浦燒活鰻魚串鰻魚在舖內活劏即燒，肉身鮮嫩多汁並帶有少少焦香味，配飯一流。相信下次會叫鰻魚飯一試。