金鶴拉麵 (和富道) (已結業)

早幾日老公放假，我哋就決定去行山，見係平日就梗係行龍脊啦！因為冇咁多人，行完山，點都要食嘢補充體力，呢排又好想食拉麵，於是就去咗金鶴拉麵啦！我就梗係揀咗「金鶴雞白湯拉麵」，必試！白色嗰兩舊雞真係好好食，好特別！最正係個湯，好濃好好味，一啖湯 + 一啖麵，食唔停口。而上面一條條好靚嘅就係炸牛蒡，脆卜卜又幾好食！而我老公就特愛黑蒜，所以佢就揀咗「黑蒜醬油拉麵」，個湯望落好清，但有濃濃黑蒜味！我仲偷咗老公嘅紫菜嚟食。都係好有特式嘅湯底。金鶴有午市套餐，但我哋就想試拉麵，所以就叫咗個二人餐，有兩碗拉麵，兩份小食，兩杯飲品。小食我哋叫咗「炸日式餃子」，熱辣辣脆卜卜，好味！另一款小食就係「唐揚炸雞」，我真係勁鐘意食雞，炸雞更是一流，配埋椒鹽，更加正。之後再加多咗一串「五花腩串燒」，肥嘟嘟入口好邪惡。飲品我哋就揀咗汽水。