西湖春天食府 (已結業)

今日去食生日飯，味道認真麻麻，而且都唔平，唯有勝在人唔多，又可以坐得耐。食左好多野，記得幾多就寫幾多啦。1. 黃金蝦，難食。因為黃金蝦係指用d「鹹蛋黃」包住d蝦仁來煎，我個人就非常唔好鹹蛋黃，因為味道實在太重，完全搶晒蝦味，而且油到不得了。2. 薑蔥羊肉，普通。羊肉好少，薑蔥好多，而且我又唔多好羊肉，食左少少，味道好鹹，普通貨色。3. 水晶餚肉，難食。味道非常鹹，好似用鹽醃過，雖然賣相幾靚，但係唔好食就無用啦，連我d「食肉獸巴打」見到都唔食多舊。4. 醉雞，無酒味。雖然切既雞位幾好，係雞髀位，肉都算滑，但係真係一d雞味都無囉，如果咁叫醉雞，我寧願叫碟切雞好過。5. 宋嫂魚羹，較淡。呢個我見到都以為幾好，實際就好淡，我食野其實要求唔高，味道恰如其份就好，但呢個就真係淡d，而且都幾稀，加上料好少，麻麻。6. 炒年糕，好淡。除外有咬口之外，我完全食唔到咩野味道。7. 小籠包，幾好。呢個係我個人覺幾好既一味，雖然我只係食一粒，但係都feel到裏面多汁，味道幾鮮。8. 炒鮮菌，難食。一句講晒，好油。9. 北京烤鴨，ok。一般水準，還可以。最後切生日蛋糕要收切餅費50蚊，唔抵，不過都無計。