重光弁当 (已結業)

禁聚餐令前嘅最後晚餐，我揀咗試呢間新開嘅重光弁当。睇見成個場都係後生仔女打骰，店入面又有鋪天蓋地嘅文宣，真係未食嘢先興奮😌。叫咗重光招牌弁当同埋自家製吉列豬扒弁当，成 set 嘢除咗飯同主菜之外，仲有柚子醋沙律，醃蘿蔔同埋關東煮，賣相一流，甚至比 menu 上面張相仲要靚。味道方面，我覺得最出色係個飯，由於採用日本米，粒粒分明，非常好食😋。另外個關東煮都煮得好入味👍，特別係嚿白蘿蔔，又腍又甜，超正。招牌弁当嘅主菜包括蝦餅，鱈魚柳同唐揚炸雞，全部都炸得外脆內軟，入面仍然保留肉汁，唔會乾噌蹭；吉列豬扒弁当選用認證非中國穀飼豬，肉色粉紅，頗有肉味，非常不俗。小店同另一間茶飲黃店黑金堂有聯營，可以用套餐價選購黑金堂嘅飲品，我哋叫咗荔枝紅茶同蜜桃烏龍，兩杯嘢飲都有好香嘅水果味，前者茶味較濃，甚至有少少苦澀，最啱茶精飲用；後者烏龍味較為清新，女仔應該會鍾意。