陶源酒家 (已結業)

今早我們去咗美孚新邨嘅「陶源酒家」飲早茶！我們叫咗西洋菜蠔豉瘦肉粥、懷舊煎蝦米腸、生煎韮菜鯪魚餅、香茜牛肉腸、山竹牛肉球、臘味蒸蘿蔔糕、濃湯海鮮腐皮卷、生炒臘味糯米飯同養顏紅棗糕！西洋菜蠔豉瘦肉粥嘅味道比較淡，材料亦相當少！懷舊煎蝦米腸嘅蝦米份量好少，同齋差唔多，要賣$16.8認真唔抵食！生煎韮菜鯪魚餅鯪魚嘅肉質好鬆散，唔係好彈牙！香茜牛肉腸嘅腸粉都算嫩滑，牛肉嘅份量都算多！山竹牛肉球嘅肉質都幾彈牙，牛肉味都算濃郁！臘味蒸蘿蔔糕嘅臘味份量極之少，差唔多好似無咁，而蘿蔔糕嘅蘿蔔份量超少，好似只係食緊「嚿」粉咁！濃湯海鮮腐皮卷入面嘅海鮮都幾爽口彈牙！生炒臘味糯米飯炒得一啲都唔乾身，糯米飯超級腍，一啲都唔煙韌，臘味嘅份量亦都係極之少！養顏紅棗糕都幾煙韌彈牙，味道都幾香甜！另外！店員嘅服務態度認真唔得，叫咗好多次話要求加水，但都無人理，仲大聲鬧我們話：「等吓先啦！我們個個而家去晒食飯！」今時今日咁嘅服務態度真係超級唔掂呀！