別府駅前料理 (已結業)

同一位中學同學和班主任食飯，由於我和老師都是荃灣人，所以就約去荃灣等。舊同學和老師都正放暑假，都幾悠閒，相反我放工就要即刻趕去，仲要遲到，認真唔好意思。老師一早諗好晒，俾左幾個食飯既choice揀，有Double Star，別府，霸王山莊＆和民。Double Star個舖位好似俾人望住晒咁，唔方便傾計，唔揀佢。和民唔係唔好，但就多人到爆，又唔掂。最後別府和霸王山莊，三位都認為別府好些少，於是就去了。要等幾張檯，不過都好快，十分鐘唔使已經有位，大家上座後，睇完餐牌就不斷傾計。菜色方面，點了大壽司盛、豆漿什菜煱、叉燒拉麵和炒什菜。另外要了兩杯"非常高興"(即西瓜汁加菠蘿汁)。壽司盛當然係最快到，普普通通啦！叉燒拉麵唔錯，好香，麵亦夠爽，叉燒都好好味。炒什菜反而麻麻，嫌佢賣相唔好。豆漿什菜煱我就最欣賞，好清新，有菇又有菜，好好味，感覺好過一般什菜煲。飲品就太甜，味道有點假，因太多糖漿。