京笹居酒屋 (已搬遷) 新店位置

其實係由個日本朋友帶我來，之後都來過幾次。舖面暗暗的，檯與檯都坐得頗密，所以多人的時候都幾嘈，加上煙霧濔漫，唔慣的見倒會調頭走，但其實好有正宗居酒屋feel，亦有唔少架仔幫襯，好似番左日本咁。大大隻手寫日文菜牌寫在紙皮上掛滿牆壁，食物款式夠多不易吃厭。最喜歡吃這裡的平凡菜色，如薯仔煮牛肉、汁煮魚頭、清酒蒸蜆等。手卷則時得時唔得，主要係塊紫菜時脆時唔脆，但Toro手卷就真的是Toro碎而非一般Tuna。各類刺身亦不差，但價錢唔平，我就寧願飲多兩杯或叫多碟野。串燒及燒物都只一般水準，唔試都無損失，照燒魷魚是其中較為好的。印象中有個日本仔侍應，幾得意的，用我的三腳貓日文order佢會用番佢歪歪地的廣東話來confirm order。另外都有唐人侍應，所以唔驚唔識order。連埋飲酒每人二百多塊，唔係平，但勝在搵番真正居酒屋的味道，絕對正過去一般港式扮日式料理多。值得一提這裡的食物碟頭不大，但居酒屋就係咁，大家只在放工在此飲酒吹水，不是食正餐的地方。