三姐海鮮飯店 (裝修中)

屋企人生日唔想去酒樓食又想食小菜，揀咗呢間飯店。嚟之前無訂位，今日星期日，客人亦算唔多，小菜有分大中細，都係第一次見。我哋六位，揀咗7個小菜，1碟炒飯，共8樣都係中Size，食物味道都唔錯，我覺得以呢個份量，價錢有啲偏貴，食完一啲都唔飽。秘制豉油雞，雞肉嫩滑，幾入味，好少見到會配少量內臟。窩貼小唐菜，炸漿好脆口，裏面有啲似墨魚膠，彈牙，唔太鹹，啱啱好，好味，唔講名真係唔知有菜，不過無問題，我唔鐘意食菜。奇妙蝦，炸蝦加沙律醬，一般般。京都骨，豬扒零肥肉，唔鞋有咬口，唔係醃到好鬆軟無晒肉味嗰啲。紅燒豆腐，味道可以。炒豆苗，都幾香，唔會食到成口油。酥炸桶蠔，好脆，味道亦幾好，不過蠔好細隻。三姐炒飯，少油，粒粒分明。