美味佳 (已結業)

就算我唔係理大人，都知「美味佳」是理大生的宵夜聖地。唯一唔好是呢度夜晚真係好多人，要等好耐。反正我多是獨來獨往，所以除非約了人，否則我通常會在下午一些九唔搭八的時段來，咁就不用等了。此店雖然也賣車仔麵，但我真係冇興趣，來這裏主要食的是其港式串燒，當中尤以雞全翼為首選。呢度的雞全翼燒得唔算太乾身，還有少許肉汁，總體而言勝在大大隻有肉地，加上我喜歡吃雞翼尖，因此全翼最啱我。值得一提的係呢度食全翼order三隻會平少少，所以我通常都會食三隻。不過，今天來之前已吃得飽飽的，這次只吃一隻算了。另外，我亦喜歡這裏的豬腩肉及韮菜，加埋孜然粉來燒味道剛好。至於此店另一名物蛋炒腸粉雖然幾香口，但我反而不覺得特別，因為蛋並不是沾滿全條腸粉，還是專心食串燒好了。畢竟這裏的串燒買得好便宜，即使叫一大堆都係七、八十元，甚抵也！