香山家宴 (已結業)

今年父親節適逢奶奶生日，一定要“豪豪”的食！中午點心加小菜，應該可以滿足到兩位。來到香山家宴，見到點心紙非常多選擇，主餐牌咁厚，應該都夠俾兩佬揀。點左兩個點心再加推介的中山特色點心拼盤。主菜當然不能沒有海鮮啦，店長推薦了蟹和鱔。涼瓜豉蒜炆奄仔蟹非常惹味！無想過可以咁煮法！另外蜜汁鳳鱔球，絕對合奶奶口味，肉厚無骨又脆又甜。口感無窮！好味！香煎韭菜餃同香煎蘿蔔糕兩款點心好似非常平凡，但食落又幾有心。我老爺去到邊間中菜都一定會點呢兩款。所以佢一定食得出不同之處。韭菜餃皮薄肉汁濃，韭菜切得非常細緻，非常多，所以好香。蘿蔔糕就一條條幼小蘿蔔絲，冬菇臘腸都不少，香甜！粉不多，所以不油膩！最後一定要提的壽桃甜品，有無人生日都要訂來食。裡面係冰肉豆沙餡，傳統中山選材，只此一家！呢碟壽包幫我在奶奶前攞唔少分數啊！