成都小巷 (已結業)

天氣咁熱，都唔係好想自己煮，所以今日決定外賣返屋企。平時外賣食黎食去都係茶餐廳，諗住搵下啲新野試下，就俾我搵到依間餐廳有外賣雞煲！餐廳位於淘大附近既一條巷仔入面，如果唔係專登搵，都唔知入面有野食。雖然屋企人同我都唔係食得好辣，但食雞煲無理由唔食辣，所以揀左小辣。落單後大約等15分鐘就有得攞，等候期間，店員仲好好咁俾左罐飲品我坐住等！外賣自取雞煲半隻只係$168，份量足夠2-3人食，店員仲俾左碗清湯我， 如果覺得太辣可以加少少落去再加熱。少辣係我接受到既辣度，岩岩好又唔會太辣，食落仲有少少麻既感覺，個汁好惹味，用黎送飯好正！雖然係半隻雞，但份量都唔少，幾多肉食，雞肉都幾嫩滑，而且好入味！煲入面仲有好多洋蔥同蒜頭做配料，索晒啲汁好正！用$168就可以係屋企舒舒服服食到雞煲，好抵食，用黎加餸一流！