京．33 (已結業)

大概7點幾嚟到食晚飯，人唔多，枱與枱中間好闊落，坐得算舒服。開張冇耐，有幾款飯堡做緊$33連飲品優惠，同男友分別揀咗豚角糖心蛋飯堡同燒汁赤雞飯堡，另加一份薑味炸雞。喺櫃枱落單後由餐廳店員負責送餐，採用半自助形式。要讚嘅係佢有冷暖水機俾顧客自己斟水。豚角飯堡好有驚喜，上層嘅飯炸得外脆內軟，豬肉醃得十分入味，加埋沙律醬同糖心蛋味道好夾，最外層紫菜嘅口感同味道有加分。相比起， 赤雞飯堡味道較為普通，但勝在用料多，有生菜、番茄同芝士，感覺營養比較均衡（自我感覺良好～）。至於炸雞，真係食到有薑味，原來味道幾夾，對我嚟講好新奇。雞肉肉質雖滑但口感較稔，唔算係我杯茶，下次嚟食可能會試吓洋蔥圈。可能係因為炸過有少少膩（但唔覺油的），食一個飯堡都好夠飽。如果第時想食啲香口嘢，一定會再嚟試試，已經揀好下次試鰻魚飯堡，嘿嘿。另外，旁邊有客人疑似反映餐具無刀（我估多數人係用手食飯堡，佢想用刀叉切⋯⋯），廚師／負責人出嚟好耐心咁聽佢講，仲鞠埋躬好真誠咁多謝佢意見，呢種態度要讚。