Ulyssa by Aldou (已結業)

一直都知道荔枝角附近有好多特別嘅餐廳，今日同朋友喺荔枝角D2 place 行完街就搵咗一間工廈嘅餐廳去食。而間餐廳嘅裝修都幾特別，一種好清新嘅感覺，所有嘅枱燈都係以木為主，入到去有一種好柔和舒服嘅感覺。餐廳食物嘅種類都幾多，我同朋友因為唔係太肚餓所以只係叫咗一個溫泉蛋卡邦尼意粉同埋一份豬鞍架。雖然份量唔算太多但係質素都唔錯，意粉賣相已經好靚，味道夠香濃而且配埋溫泉蛋非常之夾，食落去夠晒rich同creamy另外豬鞍架嘅份量都幾多，肉質都唔錯食落去仲有啲酸酸甜甜嘅感覺，配埋香滑嘅肉食落去好開胃。因為配左菠蘿莎莎嘅醬汁，所以食落去都覺得好清新，我同朋友share 食，食完都覺得幾飽。最後野飲我就叫咗一杯藍妹乳酪沙冰，一杯飲品都幾值得欣賞，所有嘅材料都非常之多而且飲落去非常之fresh，絕對唔係調味劑同埋色素食落去仲有到有少少嘅果肉，用料十足。我自己就比較鍾意依間餐廳靜靜地唔會太過多人太嘈，同朋友慢慢傾計飲嘢就最適合不過。