麻辣香鍋

营业中

休息中

好耐無同身為川菜迷嘅朋友仔撐枱腳，決定放工搵間近地鐵站嘅川菜店試試。放工時間唔使等就入到座，最值得讚係上菜速度好一致，基本上第一道上完，幾分鐘已經嚟齊晒，唔使慢慢等。招牌香鍋 $224多數川菜店食香鍋都係自選五個配料起跳，呢間都唔例外，今次分別揀咗田雞、肥牛、鴨血、娃娃菜同牛舌。由於其他餸都係有辣度，香鍋就揀返唔辣嘅醬香試試，原以為會係豉油味，點知係唔辣嘅孜然味，所有配料都幾入味。田雞尺寸唔大，但勝在嫩滑；肥牛大大塊又富牛脂香；鴨血厚切爽口。籐香雞 $66原味籐香雞係主打麻香不辣，而我同朋友想試吓有少少辣味嘅版本，就揀咗微辣程度。食落麻味唔算好重，加上辣醬反而似返口水雞。肉質幾滑，都值得一試。酸菜炒鯛魚 $98大大碟另類無湯版酸菜魚，每件鯛魚尺寸均等，同樣揀咗微辣，入口軟滑易嚼，酸中帶少許辣度，送飯一流。百香果檸檬茶 $36飲品相當足料，叫少冰都斟到近乎滿瀉。底層有百香果甜味，輕輕一拌會混合檸檬茶嘅酸澀，清爽解膩。