麻辣皇后 (已結業)

深水埗買完玩具就到食飯時間，本來就多食肆的福榮街傳來麻辣香味。原來係有得食魚雞煲的川菜餐廳。得兩丁友hea hea地食個粉再加小食都夠做。小食叫左2款，發現份量都幾多。家鄉酥肉好香脆，炸到金黃色的，辣之餘仲帶花椒八角的香，辣香在口腔入面回甘。涼拌皮蛋賣相好得意，蛋白是透明的，爽口彈牙，蛋黃有少少溏心，好creamy。仲有蒜蓉同尖椒伴食，味道更具層次感。這款皮蛋有點特別，無醃製的味道，食落反而有點新鮮感。主角的螺獅粉，湯底係用鮮螺絲熬出來，清甜帶點特別的貝殼味，第一次食建議叫微辣已經好夠辣，或清湯。螺獅粉外貌似米線，口感就比米線更滑更彈牙，吸湯能力都幾好，唔會浸漲。三鮮螺獅粉有很多菇，加了瀨尿牛丸，牛丸真的會瀨尿！咬落去，肉汁都彈出來了，彈牙又無渣，鮮味十足。牛腩螺獅粉的牛腩好軟滑，而且鬆化，肉汁豐富，比較少筋。重點係好抵食，一碗只係$40。好過食車仔麵🙈野飲叫的酸梅汁同竹蔗茅根是樽裝，有500ml，凍的，解渴又解辣。下次來，多人可以食烤魚或雞煲。