串酒里 (已結業)

餐廳位於山林道，行入小巷中，就會見到呢間串燒店。入到去餐廳環境座位都算多，而且坐得幾舒服，店員招呼非常之有禮貌。串燒種類好多有：肉類、海鮮、小食及蔬菜類等等。海鮮揀咗蒜蓉燒扇貝及醬燒日本廣島蠔。每樣一客都有三隻。蒜蓉燒扇貝面上有勁多蒜蓉，調味夠晒，扇貝亦都幾大隻，唔錯。燒蠔食落幾Juicy！蠔唔算好大隻，但係夠厚肉。燒玉子賣相幾靚，玉子充滿蛋香，面上有少少醬汁幾惹味。黑松露薯條，鍾意食黑松露嘅朋友就一定要叫。因為沙律醬充滿黑松露香，薯條又夠脆好食。燒雞軟骨我食串燒都會叫，因為有咬口又夠脆。麻辣香燒雞翼一客有兩隻。呢隻麻辣真係幾辣，我同朋友都要立即飲返可樂解解辣。辣味夠香。燒雞泡魚乾面上甜甜地，燒得剛剛好，用嚟送酒就更加正。叫咗啲蜜糖粟米唔會太甜，有少少蜜糖吊味，粟米本身又已經幾清甜。麻吉燒當做甜品，入邊有啲麻薯軟綿綿，好食。