街坊Cafe (已結業)

同女朋友行旺角行到肚仔餓，去到通菜街個陣見到間叫街坊cafe個名咁特別既餐廳就入左去食。裏面裝飾有好濃既香港味道，餐廳內面人頭湧湧，坐無虛席。街坊cafe有好多唔同種類既食物提供，但發覺個帝王極上海鮮芝士龍蝦汁意大利飯二人餐 (HKD 368)最吸晴。個二人餐非常豐富，有餐湯而我地選擇左黑松露野菌忌廉湯。個忌廉湯好重黑松露味，好香好滑。頭盤就係吞拿魚蟹籽沙律，賣相唔錯，有好多沙律菜，吞拿魚同埋蟹籽，味道都唔錯。到個主菜就係原隻龍蝦同埋芝士龍蝦汁意大利飯。龍蝦非常大隻，啖啖肉，而且肉質鮮甜。意大利飯個濕度控制得好好。海鮮配料就有魚肉，青口，蜆，蟹籽等等，味道好好味。個甜品好有香港特色，我地要左綠茶吉士雞蛋仔伴雪糕。個雞蛋仔好重綠茶味，加埋甜甜既朱古力醬，而且仲要有甜爆谷同雪糕，成個甜品真係無得輸。至於飲品就要左藍蝶花凍飲，個名好特別叫情歌王，其實就係港式西洋菜蜜，味道唔錯。另外一杯就係街坊氣泡水叫左戀愛大過天，內有玫瑰，士多啤梨，菠蘿，酸酸甜甜，好好味。