牛匠石燒 (已結業)

天氣又濕又凍，除咗打邊爐，仲好想燒肉，今晚就同朋友去咗尖沙咀食石燒牛。餐廳會提供一次性圍裙同長柄烤肉夾，想食燒肉嘅時候，先預熱石板，然後用牛脂肪塗抹牛油紙，然後就可以放肉上去燒。今次我哋叫咗安格斯牛小排同雞頸肉，店員好貼心過咗嚟指導同幫手燒肉，牛小排放板中間位置，單面燒煎到見到油花就可以翻面！雞頸肉要燒比較耐，可以擺到石板四邊慢烤，燒到變白同外皮焦脆即可！當燒到肉出油，可以放入冬菇，菇類吸收咗油份燒到外皮香脆，咬落多汁又煙韌。鐘意食蒜片、生菜記得要加埋，新鮮爽脆生菜增加口感又去油膩！鹽燒原條魷魚，賣相吸引份量都幾大，魷魚烤到有嚼勁唔乾，少少燒汁增加甜味。鹹香明太子醬加上香蔥玉子燒，甜同鹹好互補，有驚喜！主食有味素飯加上溫泉蛋，撈勻蛋汁、惹味味素同高質珍珠米，送燒肉一流。清湯烏冬上面有昆布、香蔥同芝麻，冷食簡單調味已經非常可口！飲品方面，牛匠彩虹水果茶超誇張，除咗有一大塊燒菠蘿，香濃綠茶底加上西柚、橙、檸檬、火龍果、士多啤梨肉等等，酸甜清新！草莓乳酸用咗果醬加上果肉，雙重口感，味道唔會過甜。