Saravanaa Bhavan (已搬遷) 新店位置

今次同朋友黎到尖沙咀哩間素食餐廳試正宗印度菜。一入到去見到所有食客，除咗我同朋友，全部都唔係香港人，以印度人為大多數。 餐牌有好多選擇，最後揀咗呢三種試一試：印度蔥油烤餅（$35）、洋蔥辣椒班戟（$60）、芝士菠菜咖喱（$70）。印度蔥油烤餅有兩大塊，睇落去同中式蔥油餅差唔多， 但係裏面有餡料夾心，有紅蘿蔔、洋蔥配以香料、牛油，食落去冇中式蔥油嘅香味，反而有牛油香味，好食但偏油膩，怕肥嘅朋友可以試吓其他口味。難得嚟到正宗印度餐廳，當然要試吓特色咖喱，所以叫咗芝士菠菜咖喱。睇落去青BB，裏面有一粒粒的硬芝士，但食落去菠菜同芝士味唔重，反而係香料同洋蔥味比較突出。以咖喱來講，口味非常溫和，一啲都唔辣，齋食唔配烤餅，都唔會覺得好鹹（有可能我食開重口味🤭）。洋蔥辣椒班戟，洋蔥同辣椒味都好重，班戟底微焦，有少少鬆脆感，附送三種醬料：辣醬、薄荷醬同乳酪醬，單食已經好夠味。本人比較喜歡配薄荷醬，薄荷醬口味清新，可以中和班戟嘅辣味；辣醬夠辣夠開胃，但食多幾啖就覺得太辣；乳酪醬表現中庸不過不失。