Mokumoku Yakiton (厚福街)

营业中

休息中

今日去咗尖沙咀寶勒巷度搵嘢食，同朋友去咗呢間我哋食過嘅高質串燒店Mokumoku Yakiton。餐廳主打日式燒豬料理，款式多之餘，味道亦相當有驚喜。 前菜醋漬蕃茄清新開胃，凍凍地，蕃茄多汁，酸度平衡得好好。我哋仲叫咗生蠔，岩手縣赤崎蠔鮮甜肥美，蠔肉成隻手掌咁大，入口Creamy，蠔味濃郁帶海水味，回味無窮，值得Encore！ 串燒部分，西班牙夾心肉油脂分布均勻，食落一層肉夾住一層肥肉咁，好有肉汁。上等豬脷串同豬生腸串都處理得好好，無內臟腥味。煙燻豬腩有淡淡煙燻味，側邊仲有芥末醬畀你點。蒜芯豬肉卷同秋葵豬肉卷將豬肉同蔬菜結合得恰到好處，食落爽口唔油膩。 特別推薦雞翼串，上枱嘅時候已經覺得燒到好靚，外皮香脆，肉汁鎖得住，簡單調味已經好好味！蔬菜類嘅沖繩苦瓜同抱子甘藍燒得爽脆，保留原味。最後嘅燒菠蘿香甜多汁，完美平衡成餐飯嘅油膩感。 另外食串燒就當然唔少得叫酒類飲品啦，Ginger Highball清爽解渴，而柚子 x 檸檬酒酸酸甜甜好啱女仔飲。整體而言，Mokumoku Yakiton 食物有水準，環境輕鬆，服務周到，係尖沙咀區一個不錯嘅串燒選擇，推薦俾鍾意飲兩杯同食串燒嘅朋友！