燒烤堂 (已搬遷) 新店位置

朋友見我呢排成日都食串燒，介紹我去食燒烤堂，雖然位置唔算太方便，不過真係值得一戰的。雖然冇啲咩特色飲品，但飲品種類都係足夠的大家揀的，收費都算合理。我地點左都唔少串燒，揀左麻辣味，好夠辣好過癮！大部分都好高質，冇燒到好乾，我就最中意牛舌同雞軟骨。燒豬頸肉都好香辣，2野就比我地清哂。朋友病左食唔到太辣，叫左個熱烏冬都話唔錯，我自己就冇試。仲有燒雞泡魚，出面比較少見，都值得一試呢。呢個係佢地既皇牌之一既鵝肝青蘋果多士，雖然有鵝肝但加左青蘋果一啲都唔油膩，好清新。原塊燒雞皮，真係好難揾到燒得咁好又乾身既雞皮，絕對係我係香港食過最好既燒雞皮。串燒必食既燒菠蘿唔洗講，一定要試！好甜好多汁！