麵鮮醬油房周月 (景隆街) (已結業)

我一向都唔係沾麵嘅粉絲，加上曾經食過一兩間食完都比較失望嘅沾麵之後，覺得味道太濃麵質又麻麻，都有少少怕咗。今次破例再試都係因為我朋友極力嘅推介，或者因為已經冇乜期望，周月成功令我對沾麵改觀。決定邊款之前，可以揀冷麵啦熱麵啦，濃汁淡汁而麵嘅份量亦都有得選擇，呢方面我覺得做得好貼心。最後我叫咗佢嘅signature周月沾麵，由於我怕味道太濃，所以我點左淡汁，對我嚟講味道啱啱好；個汁食起上嚟有好輕微嘅酸味，感覺冇咁油膩，汁裏面嘅豚肉味道都唔錯。而麵質嘅口感都好好，軟硬適中，亦都彈牙。如果再想食沾麵我諗我都係會幫襯返佢，因為都真係怕中伏。