餐廳裝修比較簡約風，位疊亦都好闊落，氛圍都比較安靜唔會太吵雜，令人係晚飯時間食得舒服又坐得舒服。
雜錦凍肉拼盤
拼盤種類非常豐富，有風乾榛果肉腸、意大利火腿、法式火腿、法國鴨肉醬、酸種麵包。火腿都比較鹹香啲同埋肉腸食落感覺肉味十足又唔會好膩，鴨肉醬係比較香口，多種肉配搭酸種麵包食別有一番風味。仲有酸青瓜可以配搭食解膩。
牛脊肉配法國鴨肝
呢間餐廳嘅菜式份量都算大份，牛脊肉厚切又有好多件，肉質非常鮮嫩同埋又做到表面焦香入邊仲多汁，配搭外脆內軟嘅鴨肝一齊食，口感非常豐富。
香橙烤豬腩
豬腩都係好大份喔，豬皮感覺非常爽脆香口，豬肉位置烤得口感軟熟，火候把握得非常好。香橙味又可以中和豬肉嘅油膩感，仲有羽衣甘藍，薯蓉做伴碟，豬腩溝啲薯蓉一齊食都好好味。
士多啤梨提拉米蘇
飯後甜品叫做一份士多啤梨提拉米蘇，賣相精美，甜度啱啱好，口感比較鬆軟，果肉都比較多。
花草茶（抗壓）
呢款花草茶入邊有香茅、薰衣草、玫瑰花瓣、蘋果乾。仲配有小罐蜜糖俾你調味以及一包曲奇。好大一壺，飲落感覺幾清香，帶啲草本香味又有小小甘甜
