許記車仔麵

营业中

休息中

牛池灣墟主要有3間嗱渣麵，1間之前介紹過只得番串燒，另一間就係呢間許記。舖面就係五張摺枱摺凳，例牌都係先喺門口執咩餸、麵底，俾完現金就自己捧麵入去食。冇咩花肖裝修、冇咩好特色標榜自家製另類車仔餸，賣嘅係純粹車仔麵。勝在價錢真係相宜，四十蚊有找食到碗三餸車仔麵，份量夠女人小童食。菜仲幾新鮮仲要俾好大撮（見有通菜張圖）。牛腩係腩碎，個人口味鍾意腩碎，夠腍夠入味又冇咁易攝牙罅，如果偏好大大舊牛腩就要慎選。牆上寫有款餸叫「蝦條」，實物係類似魚腐卷嘅條狀魚蛋。飲品有罐裝有盒裝，收費十蚊八蚊有找，自己喺門口凍櫃攞咗叫老闆記番數就ok。以牛池灣墟嘅嗱渣程度嚟講，呢間舖亦相對衞生。