Golem Craft Beer (已結業)

本來喺第一城探完朋友之後諗住求其食啲嘢就走。但朋友介紹話石門有間幾有特色嘅手工啤酒鋪，推薦我哋去試，就決定由第一城行咗去石門一探究竟。餐廳嘅裝修果然係好有格調，既似一間酒吧，又係一間餐廳，亦都有好多款Craft beer 揀。坐低第一件事就係嗌左兩款啤酒，同埋嗌左份唐揚魷魚圈佐酒。左面果杯係Harvest Moon (Plum), 右面係Golem Lager.以小食黎講，碟唐揚魷魚真係好大碟，而且每件魷魚都幾大嚿，佐酒一流。試完手工啤酒，又食完小食就輪到正餐部分。主菜部份嗌咗一份炸魚薯條同埋一份啤酒雞。餐廳嘅食物基本上全部都係即製，所以炸魚薯條上枱嗰陣仲感覺佢嘅餘溫。 炸粉嘅份量啱啱好， 炸魚食落唔會太油膩，而且與魚味都好出眾。好意外地，啤酒雞係成隻雞原隻上，一刀都冇切過。 當我哋仲諗緊點樣可以剪開隻雞嘅時候，店員已經主動走過嚟幫我哋切開咗隻雞，服務一流。啤酒雞本身無肉汁或醬汁跟黎，開始食嗰陣我哋仲擔心會好乾。但值得一讚嘅係，隻雞燒得好好，皮脆肉嫩，食落唔會太乾。開頭食表面嗰陣其實食唔出有啤酒味，但食落一啲肉，尤其去到雞胸同雞髀位，就食得出淡淡嘅啤酒味。