大滿喜日本料理 (已結業)

家族聚會食得開心啲，於是選了日式放題！大滿喜係其中一間未試嘅旺角放題，所以就揀佢啦！果然同家人嚟係有少少唔同，長輩們第一樣拎嘅食物就係：前菜！我自己放題好少食，不過原來都幾好味，螺肉仔好彈牙，海草都好香好爽口，係開胃嘅！又長知識了！前菜唔駛寫紙仔，出去自助拎就OK喇！之後入單嘅食物開始出現，壽司早過刺身上XD 不過確係幾好味，而且細細粒，都啱放題食，唔會太飽又可以食多啲款。當中左口魚係一定唔少得嘅，帶子都夠鮮味，但最推薦嘅創作壽司！海鮮班戟、鵝肝帶子都好好味，新式得味道嚟都夾！呢度仲有珊瑚蚌呢啲特別嘢食，不過我最愛都係正式少少嘅日本嘢，所以食啲就算，喜歡新嘗試嘅你不妨一試！值得一提，呢度簡單食物都一樣有質素，牛油粟米同埋紫薯無得頂！原本紫薯串燒我只係叫了2粒試下，點知大家食完都好喜歡，最後叫多轉一人一粒！好有薯味好甜，而且熱辣辣，食完刺身想暖暖胃就最啱喇！