金裝燉奶佬餐廳 (大圍道) (已結業)

前幾日好夜去到大圍，又肚餓，出火車站一望就望到燉奶佬仍然開門，唔理咁多食左先。雖然成十一點，店舖仍然好多食客。最正嘅係，夜一夜都有好多款食物比你揀，肉類鐵板餐，小菜配個飯，米線，話者你食飽想食個糖水都得你揀，唔怪得咁多人。不過好彩佢有兩層，等位都唔耐，幾分鐘就ok 由於都太夜，自己同朋友都唔想太heavy ,所以清清地揀左個香茅豬頸肉米線，朋友揀左個煎雞扒米線。大約五分鐘多啲就有得食，唔算耐，未餓親。清湯上嘅香茅豬頸肉米線熱辣辣，個湯好清新，一啲都唔咸，食完都唔洗飲成杯水去解渴。米線煮得恰當，唔會太腍，連埋豬頸肉放入口非常正。豬頸肉數量都算多，又唔係煎到燶哂，亦唔油，啱哂宵夜食。最好就係仲有啲椰菜伴米線，點都有啲菜健康啲。朋友塊煎雞扒都試左舊，皮都算幾脆，但咸左些少，size 都正常，宵夜夠飽。重點要講係，呢間店晚上6點後有免費糖水，日日唔同。今日係腐竹雞蛋糖水，不過呀姐話無蛋。都唔緊要喇，唔洗錢，仲要唔錯，腐竹又有，煮到半溶，好正，個糖水唔係好甜，啱哂健康嘅你。