六両三 (已結業)

得閒無事落尖沙咀逛逛，行到咁上下又係揾食時間，見到呢間舖名幾特別《六両三》，咁就推門入去試試。原來主打係台式美食，舖仔細細，但佈置格局都幾别緻有心思。川味紅燒牛筋麵 ($70)上枱，賣相不俗，呢度開宗明義話唔用味精。呷一口湯試試味，湯色清澈淡淡滲出牛肉香，麵身煙煙韌韌滿有嚼勁，牛筋入味之餘，唔會太腍或太硬，火候掌握得啱啱好，絶對值得一試。食台灣嘢又點可以唔叫滷肉飯 ($28)，小小一碗上枱已聞到香甜嘅滷肉汁味，D滷肉選料有肥有瘦，食落唔會乾食，加埋飯味香濃嘅珍珠米，一絕。小食揀咗個切豆干 (午市優惠 $10)，澆上醬油膏同少少胡椒粉嘅豆干，食落別有滋味。燙青菜+滷肉 ($26)，鮮嫩爽口嘅台灣A菜，配上香甜嘅滷肉醬汁，味道剛剛好。芭樂汁 (午市優惠 $10) / 熱薑母茶 ($20)，配埋2杯飲品，埋單160蚊左右，食得飽飽，又食得清清哋夠健康，喺尖沙咀呢區嚟講，絕對係性價比高嘅揾食選擇。