泰發泰國餐廳

营业中

休息中

Item: 泰發泰國餐廳
Rating: 3
Author: 奧志雷

Thai Fat Thai Restaurant

3.5

50 食记

味道

环境

服务

卫生

抵食

1141

屯门

$101-200

泰国菜

奧志雷

等级4

2.1K

發現好泰菜，水哥及蜜糖豆推介。每道菜都令我十分滿意，就連定春哥都識欣賞，全家都食得飽飽又滿足！坐露天座位定春大少就唔洗困係布袋入面，可以出黎一齊坐一齊食，悶悶地仲可以落地跑兩個圈添。

不幸地突然殺出檯地盤佬坐正係隔離鬼殺咁嘈兼無禮貌，對姐姐、妹妺、嬸嬸侍應粗聲粗氣。而且不停煲煙，二手煙吹晒過黎，勁討厭 ﹗大煞風景，即時變得品流複雜，環境惡劣！

坐大圓檯真舒服又寬敞，叫多幾道菜都唔洗怕迫迫夾夾，爽呀 ﹗已查詢過多次螄蚶，今晚同樣無得供應，侍應哥仔話從來未見過呢。

發現有位美女著住裙仔走來走去喎，原來職員來的。其實美女只係樓面幫手，寫下單、傳下菜。有著美麗笑容及聲線，皮膚白白淨，留著長直黑頭髮，感覺斯斯文文，衣著大方得體又吸引，必定客似雲來啦。

定春最愛食蝦食魚，聞到燒盲曹即刻企上張檯望實條魚眼都唔斬呢。定春一早坐停停等食喇，似乎記得每次到泰發都有靚魚食呢。

Singha，經過一日辛勞工作，來口冰凍啤酒舒緩舒緩，吐出悶氣，嘆到爆啊 ﹗食韓燒飲真露、食越南河飲 333、食泰菜當然飲泰啤啦。

泰式生蝦，新鮮度非常滿意，做定不是即劏的生蝦從雪櫃取出冷冰冰，肉質爽彈微黏，但個心太冰凍，凍到打冷震呢，影響味道。淡水蝦有點淡，沾上酸辣泰汁夾埋蒜片好好味啊 ﹗如果有片苦瓜齊齊食就更加開心啦。何解炸蝦頭唔翻炸一下呢？專登做冷盤的嗎？凍冰冰的炸蝦頭又油膩又出水，so bad ﹗

無骨酸辣鳳爪，吃不出辣味來，無辣不歡的我當然會失望。表面的鳳爪微微酸微微甜，爽脆略彈，入口清涼蠻滿意啊 ﹗沉底的鳳爪強酸霸道，幸好我還頂得住。如果多點鮮茄又多點芹菜的話，我地便更開心啦 ﹗

碳燒豬頸肉，穩陣之選，助酒良伴。半肥瘦肉質鬆化彈牙，不油不膩。散發焦香及微溫，豬肉味香濃滲著肉汁，原味可口宜人，沾上蒜辣汁更是惹味開胃，高質食唔停口呢。

燒雞全翼，慢工出細貨，終於出場喇。外脆內滑雞汁微滲，燒藝到加有質素，內外醃味得宜又可口，剛剛好不過咸又不會淡茂茂，連個泰式雞醬都慳返。香噴噴，好味道 ﹗

沙嗲串燒雞，雞肉嫩滑水潤多汁，時間剛剛好。沙嗲串燒豬，肉質鬆化微彈不乾硬。雞豬同樣輕醃，燒得香噴噴又熱辣辣，沾上甜而香口而不辣的沙嗲汁，食得津津有味。

泰式炸蝦餅，好得喎，必食 ﹗炸得金黃鬆脆，不硬不刮口，咬到索索聲添呢 ﹗鮮蝦味非凡突出，蝦汁微滲，蝦膠充滿生命力，跳彈活潑。味道咸香帶鮮不過火，有料到。

豬肉生菜包，咁細碟既？乾爭爭的肉鬆，肉少而紫洋蔥青蔥就大量，味道強酸，魚露味濃烈霸道，整體味道單調，香料欠奉又不香口惹味，完全不辣。色香味都麻麻地，無下次。

冬陰功湯，加入大量蝦仔，雖然無蝦味。湯底夠晒辣，好刺激。勁多指天椒及青辣椒，夠酸夠濃。要快快趁熱飲，凍左有點咸。

鹽燒盲曹，神乎奇技無得頂喎 ﹗侍應妹妹話 20 分鐘先煮好，但不到 10 分鐘就送到。起初我摸落魚皮係凍架喎，心諗唔會係一早燒定再求其焗焗就上檯掛？誰知一打開魚皮，白煙輕飄，熱燙燙的呢 ﹗真奇怪啊。

滿分無得彈無得輸，熱騰騰香噴噴，肥美嫩滑，肉汁豐富立立令，泛著淺淺的香茅香葉南薑香料味道，清爽不過份，啖啖肉勁滿足。原汁原味極可口，佔上泰式酸辣汁勁添風味。

冬陰功湯明爐烏頭，難得火力超猛呀 ﹗湯汁只需幾分鐘已經滾起，不停將熱熱湯汁倒在烏頭之上，希望魚肉受熱均勻又入味，熱先好食麻 ﹗

魚肉雖然滑滑啖啖肉，但淡水魚帶點泥味，隱弱散發著腥味呢，免強能夠吞下肚乍，麻麻地。要下點功夫除除腥、除除嗅呢，其實用粗鹽可以幫到手。

青檸明爐盲鰽，清蒸、鹽燒、鹽焗就食得多，搞搞新意思。沒有泰式酸菜肉鬆，試試青檸清湯啦。清湯真係幾清下喎，有點水汪汪，味道單調。明爐湯浸跟鹽燒質感完全唔同，十分嫩滑，十分鬆軟，魚肉散散地，有一刻我還以為比錯魚啊，麻麻地。

蒜蓉牛油燒大頭蝦，轉眼已消滅了道菜，不過仍然沒有飽[的感覺，要再下兩成補補飛。大頭蝦新鮮出爐，熱騰騰輕煙飄飄。新鮮度不能置疑，蝦氣芳香，入口勁爽彈勁嫩滑，時間剛好無 overcook。

淡水蝦味淡，配上清淡的牛油味，整體真的偏淡喎，原汁原味，食其原始鮮味。牛油芡再濃一點、再杰一點會加好，現在淋上魚露蒜辣汁也可點綴一下，效果不錯。

魚露蒸雞，一心想試海南雞飯架，侍應哥仔話只在午市供應，陰功無口福，欲哭無淚。大力推介魚露雞，稱跟海南雞差不多，我相信您。嘩，驚喜萬分，那有差不多呀，根本比海南雞更加好食呢，超好味靚雞呀 ﹗

香氣芬芳飄飄，聞得到的美味。皮肉嫩滑軟棉，不乾不鞋。嫩雞身材又好，半肥瘦無肥膏，皮薄黏黏。原味已非常美味，點汁不點汁都無緊要，連骨都損得乾乾淨淨，正到痺 ﹗

泰式炒通菜，見到不是我最愛的水通已即時面色一沉，但居然出乎意料的爽甜，難得旱通都可以如此鮮嫩，不乾不硬不韌又無渣。魚露不嗆不過咸，香而不濁，味濃多汁，好好食有鑊氣，大注大注不停地搶先夠豪氣。

馬拉盞炒椰菜苗，暫時食過最好食的炒椰菜苗啊 ﹗不苦不澀不厚不粗糙，爽爽脆脆，天然菜甜味加上微辣馬拉盞，炒得熱烘烘直送入口，趙得津津有味。

馬拉盞炒通菜，出乎意料旱通能如此爽甜充滿水份，不乾硬、不草青 ﹗鑊氣迫人熱燙燙到來，香噴噴使到口水流。調味濃郁，微辣中散發咸香︳惹味可口爽甜，不油不澀不乾不韌，非常高質 ﹗馬拉盞炒雜菜，跟炒通菜天淵之別，試一次便夠。秀珍菇、椰菜苗、芥蘭，碎濕濕，味道不太好。

泰式菠蘿炒飯，何解有洋蔥粒同炒呢，好驚喎 ﹗唯有慢慢細心地續粒續粒挑走，才能安心大大啖食呢。揀死我啦，好睏啊。炒得香噴噴，乾爽香口，雞蛋味濃，真材實料。撈上菠蘿、雜豆、豬肉鬆齊齊食，味道豐富，真的不錯。最後撈必殺黃咖哩蟹汁食，味道夾到不得了呀 ﹗

泰式乾炒豬肉河，炒功了得高層次有鑊氣，顏色均勻富光澤，調味可口甜美。生抽老抽用上黃金比例，香中帶甜、甜中帶咸，還夾雜著清新香氣。河粉黏黏完整彈彈，不油不膩，口感一流。

神乎其技，居然有塊肉片係凍冰冰架喎，而且勁嗅，吐都吐唔切，不會是朝早放到夜晚吧？其他肉片味道正常，帶著微溫。泰式乾炒雞絲河，炒河真心堅好味，食到無停口。不幸地雞肉無醃過，無肉味無鮮味，只有雪藏味。

蒜蓉法包，過份乾硬又韌又刮口，彷似隔夜麵包，一啖再見。泰式黃咖哩肉蟹，不辣咖哩可口宜人，甜味不過火、奶味不過重。蟹肉非常新鮮，彈彈滑滑，每口都釋放蟹汁。

大頭蝦粉絲煲，發現有肥豬肉及乾草頭做料頭，惹味香濃 ﹗大量完整粉絲啊，見到都開心。粉絲好好食，完全吸收蝦汁、香料及配菜味道，香甜濃郁。彈牙爽爽嚥韌，無過腍無過濕，高質無比。粉絲比大頭蝦更好食囉。細細隻淡水大頭蝦賣相低格，蝦味極淡，蝦肉又霉又腍，甩頭甩骨好肉酸。

泰式乾炒海鮮河，真材實料多籮籮，魷魚、青口、蝦仁、蛋花、芥蘭，雖則雪藏海鮮全無味道又無鮮味，幸好用河粉捲著吃還不錯啊。配料中最好食係芥蘭，爽甜脆卜卜又無渣。

食完幾注濃味粉絲後，河粉變得嚐不出味道呢，變得淡而無味，所以真的要由淡食到濃。情急智生，索性河粉撈粉絲，感覺也不錯，又幾好食喎。

泰發泰國餐廳 营业中 休息中

泰發泰國餐廳

营业中

休息中