FLIPPER'S (已結業)

唔覺唔覺原來Flipper’s已經開咗一年，但到而家依然係大排長龍，證明真係有實力嘅😌 今次就去試新出嘅期間限定宇治抹茶味班戟✨班戟質素真係唔多洗講，呢度個班戟係能夠響梳乎厘嘅空氣感同班戟嘅軟綿感兩者之間拿捏到最佳嘅平衡，試過全港咁多間最出色都應該係佢。而班戟嘅抹茶味其實唔算重，不過頂部嘅抹茶忌廉正正都係精華所在，微甜兼帶抹茶香，而且其輕盈感同班戟好合襯✨另外班戟上面果幾粒軟心朱古力又係亮點，依起嚟好似生朱古力果種感覺，仲有杯自家製雪糕可以玩埋冷熱冰火令成件事更加有層次✨ 至於限定款獨有嘅大福建議食完班戟最後先食，入面粒士多啤梨微酸多汁，可以話用嚟清清個味蕾，為成個班戟之旅畫上完美嘅句號。雖然呢度重點係班戟，但一系列嘅沙冰都唔可以忽視，當一份班戟要過百蚊時，一杯沙冰賣三十九仲要份量都幾大果下，都係幾抵飲，而且質素仲要唔差，我叫個杯朱古力咖啡味，朱古力味香濃之餘仲有陣咖啡味隨後滲出嚟，而果陣咖啡味仲要係幾香醇唔苦。而另一杯抹茶沙冰比較適合甜魔們，飲落都幾重甜，好似成件都係用綠茶kitkat打出嚟咁囉😂