阿來泰式地道風味

营业中

休息中

原來已經好耐冇食泰國菜，出開旺角行街就搵到呢間阿來泰式地道風味。本身係香港出名嘅泰國菜可能要去到九龍城食，估唔到喺旺角都搵到一間咁好食嘅泰國菜，而且價錢一啲都唔貴。泰式生蝦刺身一食落口就覺得好新鮮，一定要配埋佢嘅醬汁，個味道好難形容，醬汁冇出面食開嗰啲咁酸，係好容易入口同生蝦好夾。泰式肉碎生菜包食生菜包其實最驚就係啲菜霉霉爛爛，放完啲肉就甩晒出嚟，但呢度嘅生菜好新鮮，食落索索聲，啲肉碎有落少少辣椒，好惹味，絕對係食過最好食嘅生菜包之一。啲肉都唔算好肥，份量都好多，食完啲生菜都仲有肉淨。辣椒膏蝦頭油海鮮炒飯 呢個真係不得了，有蝦味又夠辣，海鮮用料好足，隻蝦係好彈牙，每一啖飯都有青口魷魚，啲飯炒到好乾身一粒粒，呢種辣椒膏係會令人上癮架，平時唔食飯嘅我都清左成碟飯。食完正餐一定要滿足埋第二個胃，就叫咗泰式芒果糯米飯。啲芒果好大塊，一啲都唔酸。糯米飯係熱嘅，配埋啲芒果同椰汁令人好滿足，老實講真係覺得好食過泰國嗰啲。就算食到好飽，我哋都清左成碟芒果糯米飯。依家打打下食評，諗起佢個辣椒膏蝦頭油炒飯同芒果糯米飯都流晒口水。呢間餐廳絕對可以再嚟而且價錢真係好公道， $70都唔使就有個飯食。