孖寶車仔麵

营业中

休息中

今日晚飯， 突然想食車仔麵， 所以嚟到孖寶滿足吓胃口。我同 P san 各自點咗個三餸車仔麵餐， 餐飲加 $3 要咗豆漿， 另外再點咗個腸粉加燒賣。先嚟講吓 P san 碗車仔麵， 首先係傳統辣陳皮魚蛋夠香； 豬紅質地不易散，調味夠，居然食到鮮味； 同埋豬皮不會淋，有咬口，係典型嘅車仔麵餸。另一碗係我點嘅三餸米粉， 入面嘅蘿蔔顏色偏白，但估唔到超甜而且冇渣又入味； 菜肉餃入面多饀，唔會好似其他店啲饀咁攪得太爛， 仲有啲肉味同菜味； 貢丸爽口彈牙， 有𦭐菜同香菇香味； 米粉係粗嗰種， 爽口彈牙， 份量亦唔細， 雖然菜肉餃同貢丸每樣只有兩粒，但 size 唔細。腸粉爽滑， 配埋鼓油、 甜醬、 麻醬同芝麻, 當然好味； 最後係燒賣， 雖然唔係真係用魚肉做， 但真係有少少魚味， 而且唔會成團粉咁， 好味。總結一吓, 孖寶嘅餸俾到我哋一種小時候食到嘅味道， 雖然店面裝修簡單， 就係因為咁， 帶俾我哋有車仔 (嗱喳) 麵嘅風味。