Zeng (已結業)

之前疫情影響 餐廳只係開放午市 下午茶就變咗同朋友相聚嘅最佳選擇 位於銅鑼灣v point 嘅Zeng呢排新出咗港女下午茶 當然唔好執輸🤪作為喺港島旺區嘅餐廳，人均二百幾蚊就有咁精緻嘅Tea set，性價比已經好高！環境闊落，坐得好舒服，傾計一流！食物擺盤有講究，好似黑白棋盤咁，有成十款的骰精緻嘅小點。咸點方面和牛他他調味適中，帶出到牛肉嘅鮮味，口感一流！龍蝦酥皮盒嘅味道配搭得幾好，龍蝦同芒果意料之外咁夾，唔錯！沙律配柚子啫喱可以解返醬料嘅膩胃感。鵝肝醬香配上焦糖蘋果多士，同捲住哈密瓜嘅pamaham一樣甜咸甜咸好過癮。甜品方面，睇落去甜膩嘅芝士餅伴隨淡淡嘅薰衣草香，反而有股小清新嘅感覺～桂花忌廉撻入口更加有清香撲鼻嘅花香，好食！英式鬆餅同紅桑子果撻大細適中，啱啱好一啖食哂，唔會好heavy～最後仲有乾冰伴碟嘅雲呢拿雪糕收尾，甜滋滋咁又打卡一流！食完咁多樣點心，仲可以嘆住花茶，同朋友分享下生活軼事～ 望住佢出面嘅海景 非常寫意❤️