發記甜品 (已結業)

吃完裕記燒鵝，當然要吃糖水甜品，亦到了大帽山遊食團的最後一站~發記。七時許，一行十幾人已拉隊來吃，這時人客也不多個，但到走的時候，位子大都坐滿，係幾旺場的。大家各自叫自己的心水糖水，亦叫了芒果糯米卷及榴槤酥皮卷來一起分吃，我則要了一個奇怪的組合~綠豆沙加蕃薯糖水。我的怪異兩溝顏色近似綠豆沙，加埋蕃薯糖水，意外地不太甜，好似幾好味添。蕃薯呢期當造，又甜又易腍，有食要快手；芒果糯米卷都不錯，糯米皮薄薄的，芒果肉幾大舊，亦好甜，食得過。我們十四人分吃兩碟，個個食完仲有幾舊剩，足見在座的都是慳家的人；榴槤酥皮卷剛炸起，熱辣辣。裡面的榴槤肉軟爛又夠味，與脆卜卜的外皮一起吃也不錯。在座的原來也有一部份討厭榴槤的，一於多吃一件，今次有食神。原本諗住整個拿手的榴槤甜品給大家吃，但言猶未止，已經給ban 了！埋單30蚊，都算抵食，亦一致公認是比出面的發記好吃。全日行食團食足三餐，只每人消費一百八十蚊，個人來說是經濟抵食又好玩的一天，多謝大家！