周記茶餐廳 (已結業)

今日見完醫生，好掛住周記個排骨飯，返屋企時經過香港仔就去買外買，最近門面做咗小小裝修，感覺整齊好多，買咗個細排骨飯，我前後都有人排隊，個個都係買排骨飯，真係熱賣之選！好好彩買完即刻有巴士，車上已經聞到飯香，真係好想即刻打開個飯盒。。。返到屋企已急不及待，D排骨好入味，啖啖肉，肥瘦適中，D豬油滲落D飯度，令到D飯好香，D飯有飯香，唔會太濕，加埋甜豉油，簡直係人間美味！我唔係咁鍾意食鳳爪，但係佢哋都做得幾好。三扒兩撥就食完盒飯，回味無窮，係時候開始節食做運動啦！