二少廚房 (已結業)

觀塘搵食第二天，今日想食得清淡得嚟又滋補啲，所以揀咗呢間二少廚房，我就係貪佢有湯飲。呢度有湯有飯有米線有水餃，選擇都幾多！左諗右諗咗一陣，因為今日好肚餓，最後都係決定揀配個絲苗白飯。打開個飯盒嗰吓覺得自己呢餐都幾健康，有菜有肉仲有湯飲，好耐未試過出街食飯都可以有均衡飲食，哈哈！呢個花膠雞湯非常足料，入面仲有一隻雞腳同一隻冬菇，又有得飲又有得食。我揀咗日式麻醬手撕雞，不過其實手撕雞本身都好夠味，所以最後我係生菜撈麻醬咁食，好味又唔駛做大嘥鬼。好耐冇食過粢飯，所以特登加配咗一個粢飯，留返下午茶食，雖然食嘅時候已經凍咗，但佢嘅飯仍然保持軟身，入面都好足料，讚！