布萊恩·L食堂 (已結業)

長沙灣青山道嗰度有一條街好多餐廳 今日就嚟食下呢間布萊恩l食堂 個名好得意望落似係食西餐 但原來竟然係食石頭鍋飯同漢堡為主 六點左右嚟到餐廳 只係得我哋一枱客人 坐檯檯凳凳好似以前中學嘅書枱 好得意 不過坐得就唔係太舒服 蒜香燒豚肉串 串燒上面有超級多嘅蒜蓉 下面就係串燒豬腩肉 豬肉好林 而且有淡淡嘅胡椒同埋鹽味 加埋舊薄薄嘅肥豬肉 真係忍唔到口 鰻魚芝士蛋捲 入面有鰻魚粒同埋半熟嘅芝士蛋 外面嘅蛋皮煎到好香 蛋捲上面有濃沃嘅鰻魚汁 加埋一齊食好夾 蒜香牛油雞翼 佢係雞翼上面加咗炸蒜粒 同我預期嘅唔同 不過都算香脆 呢到萬眾期待嘅主菜 芝士流心蛋手打牛肉漢堡扒配飯 店長話呢個牛肉係每日用新鮮本地牛整嘅 重要係五成熟 好多肉汁同重牛味 呢間舖頭仲係靠呢樣招牌菜起家嘅添 所以必食 另一個就係原條鰻魚石頭鍋飯 加12蚊仲有拉絲芝士㖭 完全冇諗過芝士有咁多 簡直好似瀑布咁 好興奮 鰻魚亦都大條 有成十吋 特曬出嚟 鰻魚外面加上鰻魚汁好香 而且啖啖魚油 加埋芝士一齊撈飯 真係好好食 不過要趁熱食 如果唔係就會越嚟越多飯焦㗎啦 跟餐野飲仲有半價 叫咗香蕉牛奶 係呢度新鮮整嘅 淡淡嘅香蕉味 唔係死甜