發哥粥底海鮮火鍋 (已結業)

今日朋友帶左我去九龍灣德福附近食飯，原來個度有間食海鮮邊爐。仲好抵食，都係二百幾蚊就有好多款海鮮。呢間餐廳好似好隱蔽，原來好多人知，8點鐘已經坐full了。野飲汽水任飲，仲有暖既竹蔗水飲。個海鮮set仲可以自選8款火鍋配料。海鮮有8種:每人半隻龍蝦🦞啖啖肉，好爽口彈牙！多寶魚，都大份。魚肉嫩滑，又幾有鮮味！好鐘意食多寶魚。海蝦 ，每隻都用竹簽吉住，夠哂方便呀。每人一隻大鮑魚，鮑魚夠鮮甜，好味。食落好爽！貴妃蚌 ，唔會話有沙。食落新鮮彈牙！黃金蚌，好多隻。紐西蘭聖子，夠大隻。聖子食得出鮮味。而且餐廳夠細心，有個漏斗幫我地計住d時間，唔洗驚未熟，食得放心。頂級肥牛，肉質都嫩，質素唔錯！另外佢既火鍋配料都好大份，好多粒。自家製墨丸，食落好彈牙。魚骨腩🐟好多塊！食到大家都超飽肚。食到最後就會幫我地落飯，南瓜栗米等，煮成粥。令到個粥吸收哂啲海鮮精華。