辣吧 (已結業)

依幾日喺facebook見到有介紹依間餐廳，本身好鍾意食海鮮，網上見到有咁大盤o既海鮮即刻想黎食啦。跟手上黎openrice睇睇試左o既師兄師姐有咩comment，見到又有啲劣評咼，即刻有啲淆底，不過諗諗下都係信自己，想試咪試囉。即刻whatsapp晒成班frd上黎食，中伏都有一班人陪呀嘛 XD。入到黎見到個裝修都幾特別，好中式feel，地方都幾闊絡，坐得都幾舒服o既。我地嗌左個12人份量o既海鮮大咖，總共有8款海鮮。到上枱嗰陣真係嘩出黎，成盤野超大，啲麻辣味又好香，聞到都想食。海鮮有魷魚筒、中蝦、青口、元貝、貴妃蚌、蟹、鮑魚、蜆，而侍應將酒精放在盤下面加熱，我地等啲麻辣湯滾左，先食海鮮。咁多樣海鮮我覺得鮑魚同貴妃蚌最好味，又鮮又夠晒味。底下仲有薯粉、豆腐卜和薯條。豆腐卜和薯條吸晒啲辣汁，入晒味，正。最後再嗌左碗四川冰粉做甜品，凍凍地又煙煙韌韌，好似啫喱咁。解晒辣又解晒渴，唔錯。成班人食到超飽咁走。好彩都信自己直覺有上黎食，下次應該會再叫其他frd一齊食，唔洗驚中伏 XD 。