玄鮨 (已結業)

之前同事介紹我去位於銅鑼灣嘅玄鮨，今日就帶埋女朋友晏晝就過去一試。店內環境清幽，見到玄鮨曾經係米芝蓮推介餐廳(2014-2018)。晏晝嘅lunch set都幾多選擇，我哋叫咗刺身lunch同特上chirashi兩個套餐。刺身lunch set 十分之豐富，有前菜、9-10款嘅刺身、汁煮白魚、麵豉湯、白飯。特上chirashi亦有9-10款嘅刺身，刺身仲有海膽同三文魚籽，夠哂豪華。刺身底下仲有白飯，再加埋前菜、茶碗蒸同麵豉湯。兩個餐光係賣相都已經非常吸睛。兩個餐嘅刺身都非常新鮮好味，食到飽一飽。Lunch set 另外仲有咖啡或甜品，是日甜品係士多啤梨奶凍，香濃嘅士多啤梨味同時亦感受到牛奶嘅味道，好平衡，唔會則重咗喺士多啤梨/牛奶其中一邊。