加多娜天然酵母手作麵包店

营业中

休息中

铺面冇乜特别亦唔显眼，唔系睇过介绍专程嚟试真系行过咗都唔知。不同面包款式摆满架上都算系几琳琅满目，闻说炒蛋包出名，今次专程嚟买。佢哋出品嘅面包每个都独立包装，你可以话卫生，亦都可以用环保角度去批评，见仁见智。绝对要澄清，啲蛋比我搞到一Pat咁系因为我喺个背囊度攞返出嚟影相，而且因为佢有透明胶袋包住所以水气凝结喺包上面睇落湿粒粒咁样，都系我处理嘅问题，同面包舖无关。餐肉炒蛋包块餐肉10分之香口，如果表面有啲焦脆就更加一流，鸡蛋份量相当足够但略嫌蛋味唔够，亦唔系话好滑流𠮶只口感，但味道配搭得宜，整体感觉良好。无添加手工吐司可以话系我系香港生活左咁多年食过最好嘅方包，软绵绵质感细密，唔系好强嘅麦香，但口感之佳令你不禁食完一块又一块都唔知饱。食完你就清楚超市买𠮶只X顿其实有几垃圾。台湾3Q饼，馅料有麻糬、豆沙、肉松、咸蛋黄。听讲肉松由台湾订制供应。饼面铺满芝麻，黑白两色，卖相相当吸引。饼皮系酥皮。里面嘅馅料唔系讲笑，真系可以分开逐一去品尝，四样馅料水准都相当之高。咸蛋黄唔会死实太咸，麻薯清香烟韧，豆沙唔会太甜太抢，最出类拔萃系𠮶少少好香嘅肉松，令我深深体会少少对于整体可以有几重要。