加多娜天然酵母手作麵包店

营业中

休息中

鋪面冇乜特別亦唔顯眼，唔係睇過介紹專程嚟試真係行過咗都唔知。不同麵包款式擺滿架上都算係幾琳琅滿目，聞說炒蛋包出名，今次專程嚟買。佢哋出品嘅麵包每個都獨立包裝，你可以話衛生，亦都可以用環保角度去批評，見仁見智。絕對要澄清，啲蛋比我搞到一Pat咁係因為我喺個背囊度攞返出嚟影相，而且因為佢有透明膠袋包住所以水氣凝結喺包上面睇落濕粒粒咁樣，都係我處理嘅問題，同麵包舖無關。餐肉炒蛋包塊餐肉10分之香口，如果表面有啲焦脆就更加一流，雞蛋份量相當足夠但略嫌蛋味唔夠，亦唔係話好滑流嗰隻口感，但味道配搭得宜，整體感覺良好。無添加手工吐司可以話係我係香港生活左咁多年食過最好嘅方包，軟綿綿質感細密，唔係好強嘅麥香，但口感之佳令你不禁食完一塊又一塊都唔知飽。食完你就清楚超市買嗰隻X頓其實有幾垃圾。台灣3Q餅，餡料有麻糬、豆沙、肉鬆、鹹蛋黃。聽講肉鬆由台灣訂製供應。餅面鋪滿芝麻，黑白兩色，賣相相當吸引。餅皮係酥皮。裏面嘅餡料唔係講笑，真係可以分開逐一去品嚐，四樣餡料水準都相當之高。鹹蛋黃唔會死實太鹹，麻薯清香煙韌，豆沙唔會太甜太搶，最出類拔萃係嗰少少好香嘅肉鬆，令我深深體會少少對於整體可以有幾重要。