風月堂 (已結業)

自從新世紀果間冇咗之後，就冇再食過風月堂喇，今次難得有機會就緊係要把握啦！位於轉角位既入口唔多起眼，上到去係簡約既白色裝修，感覺舒適。平日未夠七點已經要等位喇，好在等左一陣就有。我地兩個女仔叫左以下食物：1)洋風盛盒(材料包括芝士菠菜雞卷、炸帶字、釀忌廉蘑菇同羊柳粒。全部都好新鮮，炸帶子大大粒真材實料，唔係果啲魚肉扮的，蘑菇就好Juicy，羊柳粒冇乜羶味，亦唔靱，唔錯！係菠菜雞卷比較漏少少，但都係好味既)2)海鮮湯意粉(呢味係風月堂既招牌菜，湯意粉平時好少食，估唔到茄汁湯底既意粉係咁鮮味既，酸酸甜甜非常醒胃，加上豐富既材料，有蝦、魚、青口，極力推介，我連湯都飲埋哩！)3)鮮果紅豆酥盒(呢度甜品種類繁多，花多眼亂一時都唔知揀邊款好，睇見呢個賣相幾靚就叫佢啦！果然不負所望，同張相一樣咁靚！紅荳味既雪糕夾雜住大大粒紅荳，奶味濃郁，好好味啊！配合新鮮熱辣既酥皮底，雖然啲水果少少酸，但都唔會破壞整體美味，GOOD ^^)呢度食物好好味，不過就坐得逼啲，同埋可能環境所限，人多時好似街市咁嘈，如果可以改善下就perfect喇！另外服務都合格，期間仲見到一個大肚待應要捧餐，都替佢辛苦哩！