千鍋居 (已結業)

同朋友讲话约食鸡煲，约左好耐都未成事，今晚终于”美梦”实现！话说食鸡煲，一大班人最好，嘢食都可以叫多几款。首先出场当然系鸡煲，一行7人当然系叫个大SIZE，由于唔系个个吃得辣，只系叫左少辣。上菜时鸡煲面舖上大量芫茜，再放上台面电磁炉reheat 返，等个煲滚返起就可以按个人喜好混合埋d 芫茜一齐食，食得最够味当然系混埋芫茜，川椒味加芫茜香味溢出！个汁非常之好味，个汁用左好多香料去煮，非常惹味，鸡油加香料煮成的鸡汁最啱系捞饭食，白饭都食多两碗！至于鸡肉方面，系一般货色啦，现在系香港食到的鸡肉，想讲返句”鸡有鸡味！” 之类的”废话” 其实都颇难，大部份冰鲜，乜鬼鲜味都无晒啦。今晚个鸡煲可以话系鸡汁比鸡肉优胜！我地仲叫左田鸡煲(要打去预订)，田鸡肉比汁料包裹著，肉质颇嫩，稍嫌田鸡肉不够肥美，此外其实相当好味。其他的”蒸酿豆腐”、”面酱蒸鱼”、” 南乳煮斋” 都系不过不失，胜在售价合理抵食！另外一个推介的是”花蛤蒸蛋” ，非常滑，花蛤的鲜味流入左蛋汁液内，又一伴饭佳品。因为店舖未有酒牌，今晚自携红、白酒各一支，配浓味的食物就系一流。总括今晚系又平又抵食，非常满足的一餐。