松山海鮮鍋 (已結業)

朋友去咗外國working holiday，返嚟香港探佢屋企人，咁耐冇見一定見下面嘅。去咗加拿大咁耐，梗係俾佢話事食乜啦，咁佢揀烚烚下嘅火鍋。1行4人去完Mira Place行街之後就過咗去山林道，book咗位所以都唔使等就可以入去坐低。裝修都係精緻，坐卡位都算闊落，唔太逼。其中有2個人唔食得辣所以叫咗個醉雞鍋湯底，個湯底就咁飲都已經好好飲，我地個個未烚之前已經飲咗半碗。牛頸脊口感軟滑又嫩口，油花十足，一D都唔韌。正主角係龍躉，厚切啖淡肉，食落質地紮實又唔腥。推介芝士腸、魚皮餃無令人失望，食得出唔係D平價版雜牌子嘅貨。冰豆腐、唐生菜就正正常常啦。黑松露餃味道濃郁，鍾意食松露嘅朋友就要試下。咁耐無見掛住傾計，食咗好多野都無影相，臨走見到隔離枱食緊隻長腳蟹，好似好好味咁，下次黎食要叫嚟試下。