松山海鮮鍋 (已結業)

今晚和朋友路經到上址食了幾道家常小菜,點了酥炸生蠔,椒鹽酥炸九肚魚,鼓油王炒鵝腸, 咸魚蒸肉餅及古魯肉, 每碟皆有高水準,價錢都頗適中,值得推介下次有机會會再去試打邊爐,聞說火鍋也超正

依家間間餐廳幾乎都會推出外賣優惠，但就唔係間間都就腳又啱食嘅。我就經常叫呢間外賣，套餐包飲品或者例湯。幾鍾意食呢度嘅梅菜扣肉飯，呢個飯每日都有優惠，扣肉煮得軟淋入味，梅菜鹹香送飯。xo醬肥牛炒烏冬都唔錯，肥牛都有幾多塊下，烏冬炒得火候啱啱好，軟硬適中，啲調味都唔錯，xo醬幾惹味。每次去都揀自取嘅，仲有八八折。打工仔嚟講係幾優惠嘅價錢，用早餐價錢食到lunch，都算係咁啦。包裝得幾好，好少有漏汁嘅情況。

呢排好耐都無食刺身，今日收工，約埋同事一齊去食。呢度嘅刺身真係超級多款，仲要自設魚池，食到活魚刺身。擺盤好靚，好有日式風情。不過後尾睇返自己手震，影到蒙晒。擺落口就知唔係得個樣，味道鮮美。我地都仲有打邊爐，點咗松山胡椒海魚濃湯，湯底幾正，有胡椒辣味之餘又有魚鮮味。手打丸點咗幾款，我覺得黑松露丸幾好味。見到有非洲冰菜食都幾特別，我覺得佢呢度嘅火鍋配料或刺身都好齊全。小食最中意黃金魚皮，就咁食好香口。

 朋友推介一齊去呢間餐食晚飯，佢話之前去過打邊爐，D食材好新鮮，湯底又好味，所以想去試下食小菜。有得食我就梗係話無問題啦，自己上網睇時發現餐廳真係主打係做火鍋，連個名都係用個「鍋」字，唔知小菜得唔得架呢？！？薑蔥霸王雞隻雞蒸得啱啱好，食雞胸肉唔會鞋，入面仲有肉汁，調味做得幾好，唔會過鹹，廚師手勢唔錯。芥末豬柳粒蒜片／芥末牛柳粒就食得多，改用豬肉整又會點呢？有驚喜，雖然唔會好似牛肉咁煮到7成以保留肉汁，但係豬肉熟透都幾juicy，同埋芥末同豬肉原來味道都係好夾，呢個好食。

見咁多好評，決定一試都幾失望食物上菜次序好慢同奇怪有無試過上晒所有野，食都7788 再後加野，之後個小食先黎？除在珊瑚蚝幾好之外，其他野都普通大家一致認為每人$500，可以有太多更好的選擇...

打邊爐呢，果啲胡椒湯底，番茄湯底，沙嗲湯底真係食到厭。今次就試下啲特別嘢，進補醉雞湯，睇MENU仲係用新鮮清遠雞整嘅，聞落好香。配料方面因為都點咗幾多，好難記得所有嘢。我就覺得佢啲餃子真係幾好味，我最鐘意食泡菜牛肉餃！少少辣，又有牛肉鮮味，好食。仲有黑松露墨魚滑，黑松露味道好香濃，魚滑彈牙。朋友就比較鐘意呢度嘅海鮮，覺得款款新鮮。尤其係刺身。價錢中上，但有相應嘅質素，都算係值！環境闊落，啲枱隔得都幾疏落，坐得幾舒服。

忍左咁多日, 終於忍唔住要同朋友仔出黎打邊爐今次搵左間未試過既松山海鮮鍋叫左打邊爐唔少得既炸魚皮、海螺刺身、丸類、手切牛等等湯底叫左非常少有而又有特色既黑松露菌皇湯黑松露忌廉湯就試得多黑松露湯底打邊爐就真係第一次試，亦都係第一次見估唔到個陣味都幾香濃，滾起之後忍唔住裝少少湯出黎飲下真係嘩一聲，估唔到會係正急不及待夾塊炸魚皮落去浸佢三秒再放入口, 魚皮既香脆遇上芳香既黑松露, 真係最佳拍檔佢既火鍋料都幾唔錯, 特別係牛肉, 入口即化無多餘既筋, 每一片牛肉都係極滋味

湯底除咗有沙爹、清湯、芫茜皮蛋等一般湯底之外，仲有幾款特色湯底。我地選擇咗黑松露菌皇湯。湯攞到嚟時聞到味道好香，睇到顏色都好濃郁，我地個個都飲咗1碗先。建議大家都要飲咗湯先，等佢地加湯先開始打邊爐。點咗個小食開下胃，椒鹽鮮魷外皮嘅炸漿唔會好厚，魷魚唔會韌，配埋椒鹽鹹鹹香香，用嚟送竹蔗茅根水都好正！牛柳粒份量都幾多，雪花好平均，淥熟咗都唔會縮水，牛味夠。黑毛豬腩大大塊，不過都比較肥，食2片已經覺得漏，我認為用嚟做燒烤配料包泡菜食仲合適。蟹子丸係另一個亮點，一咬入面爆漿。其他配料都幾好，質素都好平均。

之前一早就Book咗呢度同阿爸慶祝生日，都點咗幾多餸下。我覺得佢地呢度啲餸都幾家常，都係注重返食材嘅新鮮和原汁原味。味道都唔錯，唔會覺得重口味或者食咗口乾。瑤柱肉鬆蒸水蛋：蒸水蛋我至愛，蒸得又滑又香，令我食唔停。瑤柱都幾多架，食落好鮮美。燒汁牛柳粒：牛柳粒炒得唔好食就真係好難入口，但呢度嘅牛柳粒火候掌握得啱啱好，食落口感嫩滑，又可保留到內裡嘅肉汁，好Juicy！豉油皇炒鮮鵝腸，鵝腸爽彈，調味都啱啱好，唔會太鹹。拍蒜炒藕片：蓮藕鮮甜，爽口，蒜味提鮮。

依家好多火鍋專門店都會提供火鍋以外既選擇例如刺身、小菜之類呢間松山都唔例外, 佢地都有好多款刺身俾你揀, 包你食得滿足刺身太多款式唔知點揀好? 佢地仲有刺身拼盤俾你揀, 有選擇困難症既朋友都唔洗怕老老實實, 佢地既刺身CP值都相當高, 價錢唔貴, 但刺身夠哂新鮮, 亦都唔會係切到溶溶爛爛或者薄到透光個種我覺得呢個價錢都算係咁~~當然, 呢度既火鍋專門店, 火鍋料都當然唔可以睇小既角色啦淨係湯底都有十幾款選擇我地就揀左比較少見既胡椒海魚湯底夠哂香濃惹味, 個湯一滾起即刻聞到好濃既胡椒香味我地叫左個海鮮拼盤、頂級手切肥牛、牛舌心、黑柏葉同其他丸類牛肉方面質素非常掂!! 特別係牛舌心, 爽口得黎唔會韌到咬唔開, 真係唔錯而其他手打丸類都非常足料, 彈牙爽口, 正!

打邊爐從來都係我既飯局飛佛呢間松山海鮮鍋聽朋友講極力推介, 咁就一於試下佢啦佢地除左火鍋之外仲有刺身同小炒食又幾好喎~可以叫兩碟小炒黎打邊爐我地叫左麻辣鍋底，火鍋料就唔少得叫手切肥牛啦仲叫左條活魚同其他丸類、餃類黎打邊爐條活魚真係睇個色水都知夠哂新鮮, 掉落鍋滾兩滾就食得, 確係幾鮮味仲大大條, 兩個人爭D食唔哂手切肥牛同樣好高質, 一食就知咩叫入口即溶其他丸類同餃類都相當唔錯, 雖然普遍食物價錢比較高少少但我個人認為一分錢一分貨, 價錢同食物質素絕對係成正比既

球會指定活動之一就係打邊爐，因為每年會慶都喺農曆新年前後，咁冬天就通常會選擇去打邊爐。久而久之就變成咗冬季指定活動啦。人多嘅好處係可以點多D配料同埋點2個鍋，可以試多D唔同嘅湯底。其實全程都掛住傾計，都無影到相，比較印象深刻嘅有以下嘅食物。醉雞鍋入面嘅雞好腍，肉質又無煮到好韌，都算幾滑。海鮮拼盤有幾款海鮮都唔錯，聖子同海蝦好新鮮。鮑魚都唔錯，出菜時好生猛不斷咁郁。配料方面牛肉肥瘦均勻，丸類多數係自家製作，鮮蝦雲吞同黑松露餃都好食，食物用料新鮮。

其實都好耐之前食過，依加補返食評先。上次嚟係一大班Friend，包咗VIP房。仲可以唱K打麻雀，成個Party room咁，好正。我覺得松山胡椒海斑濃湯幾好飲，我飲咗兩碗先開始打邊爐。魚皮餃和牛頸脊係我最愛，魚片和響鈴當然不可少，菇類同咩湯底都係咁夾，叫咗幾款菇，第一次食姬松茸（乾），之前有聽過話營業價值好高，可以增強免疫力，估唔到口感和味道都幾好。好想買啲返屋企煲湯。仲有佢地嘅香菇豬肉燒賣都唔錯，食完仲叫多一份先夠。呢度環境明亮乾淨，包廂娛樂設施又多，適合多人聚會嘅打邊爐

最近疫情搞到人人都掛住周圍搵口罩, 都無咩心情不過老友既生日飯就點都要食既...生日飯就揀左去食佢最鐘意既打邊爐, 安全起見當然要用公筷去夾食物啦, 依家d菌咁勁!!呢間松山之前都食過一次貪佢呢度招呼好、坐得舒服同埋多款式揀佢地連湯底選擇都多過人除左最大路既沙嗲莞茜皮蛋之外仲有黑松露、冬陰公等等老友最鐘意食辣, 又鐘意食泰國菜, 當然就揀左非常有泰式風味既冬陰公湯底黎招呼佢啦嘩~個湯一滾起就聞到好正好惹味既冬陰公味道入面仲有兩三隻蝦同埋有好多調味料, 真係一睇一聞就知個湯底好足料, 正呀喂!!侍應就建議我地裝碗湯飲下先, 佢之後再幫我地加返湯黎打邊爐, 都話服侍周到架啦個湯底味道真係正到暈, 同我係泰國餐廳飲既冬陰公味道一樣酸辣度啱啱好, 勁惹味~確實係正火鍋料我地就叫左牛頸脊、海鮮拼盤等等牛頸脊入口即溶, 肉味濃郁海鮮拼盤都好抵食, 每一款既海鮮都食得出非常新鮮, 打邊爐一流呀!!

雖然好多公司都Home office ，但我地公司無嘅。仲有開年飯食，真係開心。好少餐廳有開。老闆就揀咗松山食小菜。呢度主打食海鮮嘅，有多款海鮮選擇之餘仲有多款料理方式。如清蒸，果皮蒸，紅燜等。仲有老虎班食。蝦同龍蝦當然不可少，蒜蓉粉絲蒸蝦惹味又餸飯，波士頓龍蝦當然芝士焗啦。款款新鮮，鮮甜彈牙。撈起黃金雞：切得薄薄一塊，有好多青瓜同花蘿蔔，有種食緊片皮鴨嘅錯覺。時令老火湯：湯睇落油油地，但撇過面頭飲幾清甜。呢度出名刺身，但冬天太凍都係唔食住生冷嘢。