四個套餐可供選擇，但因為我哋太想食龍蝦，所以就揀咗原隻龍蝦套餐。
揀咗套餐之後就可以親自去揀海鮮！成個感覺就好似去咗鯉魚門咁，缸內嘅海鮮游下游下，比你慢慢揀，店員仲好好咁教我哋揀龍蝦同蠔
揀完海鮮就交比店員處理，拎埋醬料然後返埋位等食（其實佢仲有個蔬菜吧比人任拎蔬菜，但個餐太豐富我哋真係食唔落）。首先店員拎咗老火湯同溫泉蛋，個湯比較淡口，無味精。溫泉蛋就係普通溫泉蛋，無咩特別但好食嘅。
之後就店員就幫手落粥底，同埋蒸雞啦～個雞好入味好甜，我掛住食都唔記得咗影相。
食食下海鮮就黎啦！
見到真係哇一聲，即刻瘋狂影相，店又好好幫我哋影合照。等我哋影晒相之前店員就問我哋想食咩先，我哋話龍蝦，佢就幫我哋放隻龍蝦上蒸鍋，然後教我哋點樣set時間同火力。枱面有個list係講咗每一樣嘅要蒸幾耐，第一round打後就係我哋自己蒸d海鮮啦～
呢度每一款海鮮都非常鮮甜！隻龍蝦雪白彈牙又有膏，其實完全都唔需要加任何醬料，食佢嘅原汁原味先係最正！每蒸好一樣野拎上碟食兩啖就急不及待要蒸第二樣，需要好忙碌但真係太好食所以好心急
不過自己蒸都有樣好就係可以自己控制個速度，同其他食蒸鍋嘅舖頭唔同，其他地方係由店員去蒸，蒸完一樣就即刻整第二樣，好多時都未食完就蒸好第二樣，結果隻碟滿晒d野食又凍晒，但係呢度我哋自己可以計到岩岩好，食完一樣再一樣
食完所有海鮮就食個粥底同碗糖水。個粥本身有兩大舊豬骨同d南瓜芋頭，已經好甜，加埋d海鮮流出黎嘅精華，成個層次真係唔同晒
雖然話個粥底吸晒d精華，但真係太飽，我都只係食咗幾啖。糖水就係椰汁芋頭西米露，仲要係好足料嗰隻。平時見到足料糖水會好開心，但呢刻真係太飽食唔落了
假日黎嘅話佢仲有live band，幾日氣氛架！雖然遠咗少少，但值得黎一試
