鮨真 (已結業)

🍣鮨真尖沙咀亞士厘道17-19號20樓返新工要食餐好，約咗男友食尖沙咀嘅鮨真，貪佢個景靚，食物質素又出晒名高，最近仲有秋季限定menu！前菜係松葉蟹肉，配水母同埋土佐啫喱，菜式望落精緻，味道清新開胃。刺身賣相甚佳，鮮甜美味。特別推介時令嘅秋刀魚刺身，油脂豐潤，味道濃郁。本身擔心食北海道毛蟹會食到好狼狽，但餐廳貼心地將毛蟹拆肉上碟。蒸嘅時間啱啱好，保留咗蟹肉嘅原汁原味。配上蟹膏，又係另一種風味。下一道菜係秋季限定嘅煎松茸。奢華嘅松茸食落有菌類獨有嘅濃郁鮮味，咬落好多汁。真係一生人要試一次嘅美食！而牛肉烏冬看似平凡，但令人好滿足。湯底充滿鰹魚嘅香味，牛肉生熟度啱啱好，烏冬彈牙。最後以雪糕做作結，個人偏好海鹽味，淡淡嘅鹹味加上牛奶味，清新怡人。