龍皇酒家 (開源道) (已結業)

老婆話好耐冇去過酒樓食晚飯，一於接佢放工，順便去觀塘覓食。地點揀觀塘龍皇酒家。餐牌有晚市套餐。四人套餐價錢最吸引，唔使$650 ，雖然只有兩個人，照揀。最多食唔晒打包。老火湯係山班煲粉葛湯，燒味揀燒鵝例牌，魚揀清蒸沙巴海斑，小菜可以揀兩樣，結果揀咗桂花炒瑤柱及蝦醬蒸豬面青。老火湯鮮甜降火，夠晒火候，但由於係四人套餐，結果飲唔晒。燒鵝賣相好正，食落亦唔錯，做到皮脆肉嫩，分量亦交足功課，小菜當中做得最好。海斑size算大，蒸得剛剛好，魚滑，蒸魚豉油調教得不錯。桂花炒瑤柱實屬芽菜炒瑤柱，份量亦多，但味道比較清淡，要加豉油調味。蝦醬蒸豬面青蒸得剛剛好，豆腐香滑，蝦醬份量亦恰到好處，豬面青有咬口，整體合格有餘。整體來說，水準算不錯，再加上價錢嚟衡量，性價比亦很不俗。