十侍 - 棉花糖A5和牛壽喜燒專門店

营业中

休息中

一般日本餐廳嘅所謂壽喜燒，唔知點解都係有種港式味道，平價肥牛配埋唔鹹唔淡嘅湯底，食完仲慘過唔食。 壽喜燒癮起，決心貴少少都要幫襯高質日本味道。本來擔心鹿兒島黑毛和牛壽喜燒二人前只係得六塊牛，會唔會到喉唔到肺，但原來一片都有成塊面咁大，絕對夠晒滿足。到坐低都唔明咩叫棉花糖壽喜燒，仲以為講緊個肉質，點知驚見店員手法純熟咁卷左一枝棉花糖放喺鍋上面，開爐加完湯底，棉花糖就慢慢消失咗，幾得意。基本上見到和牛油脂嘅雪花分佈已經知道好食，店員輕輕掃兩下，僅僅熟嘅狀態之下點埋蛋汁一齊食，嫩滑到極點，牛味同蛋香喺口入面迸發出嚟，真心覺得好幸福。炸物都好有驚喜，秋葵、蓮藕、冬菇全部新鮮爽甜，外皮脆得黎好透薄，尤其海老超級鮮甜彈牙，咬落去就感覺到一梳梳厚實嘅肉質，物有所值。