陳根記

营业中

休息中

同家人食飯最適合就係去食小炒，叫番幾味餸一齊食不知幾開心。以前成日幫襯沙田禾輋大排檔的陳根記，知道原來轉戰去咗沙田石門，入面的裝修格局也維持着大排檔的風味，就算宵夜時間都好旺場！實在太肚餓，餐牌有咁多選擇更加肚餓，有晒煎煮蒸炸方式嘅菜式！見到隔離枱食得咁滋味，就點了幾款小菜，再每人叫了一碗白飯。十三香炸蝦真係好香，賣相亦很吸引，一盆都起碼有十幾隻，認真抵食，而且湯底有麻有辣，蝦肉爽口彈牙，入面仲有粉絲索晒湯底嘅精華味道，好鬼滋味。平時好少係屋企食住家菜，有條魚食下都好開心🥳，豉汁蒸倉魚蒸得恰到好處，魚肉好爽滑，而且鮮味四溢，又係撈飯一流。點少得叫一碟蔬菜清一清腸胃，朋友鍾意食菠菜，就叫了金銀蛋浸時蔬，我最喜歡的蛋花鋪滿面，味道剛剛好唔會太鹹，撈飯一流。啲餸實在太好食，話咁快就清晒！而特飲及甜品餐牌都有廿多款選擇，各有特色，就試試這裏人氣熱賣的特色榴槤奶露，入面嘅榴槤肉都頗多，還有佈滿口感的西米，果然足料。呢一餐晚飯真係食到捧住個肚出門口，大滿足！